ეკა აბშილავა - "ორი კვირის წინ წავედი და ცხვირის ოპერაცია გავიკეთე"
რუბრიკა "სტილის" სტუმარია "კომედი შოუს" მსახიობი ეკა აბშილავა. მსახიობს არ უყვარს მოუწესრიგებელი ადამიანები, ამიტომ სულ ფორმაშია, მოსწონს რადიკალური ცვლილებების შეტანა საკუთარ გარეგნობაში. რამდენიმე კვირის წინ ეკამ ცხვირის პლასტიკური ოპერაცია გაიკეთა.
- ამ ბოლო დროს ძალიან შემაწუხა ჩემი ცხვირის ფორმამ, ამიტომ ორი კვირის წინ წავედი და ცხვირის ოპერაცია გავიკეთე. მიყვარს ექსპერიმენტები და ადვილად ვიღებ თამამ გადაწყვეტილებებს. თმა მოკლედ შევიჭერი და წითლად შევიღებე. მინდა, სვირინგიც გავიკეთო, მაგრამ წლებია ვფიქრობ, რა დავიხატო სხეულზე და სად გავიკეთო ტატუ, მხოლოდ ამიტომ ვერ მოვახერხე აქამდე ამის გაკეთება.
- ჩაცმის როგორ სტილს ანიჭებ უპირატესობას?
- ძალიან დატვირთული გრაფიკი მაქვს, ამიტომ მუდმივად კედები და ჯინსი მაცვია, თუმცა სიამოვნებით ჩავიცვამდი კლასიკური სტილის სამოსს და მაღალქუსლიან ფეხსაცმელს. ქალი ასეთ სამოსში უფრო ქალურად გამოიყურება. სამწუხაროდ, მხოლოდ დღესასწაულებზე ვახერხებ ასე ჩაცმას.
- როგორ უნდა ეცვას ქალს წვეულებაზე, კარგად რომ გამოიყურებოდეს?
- ადამიანს ყოველთვის გემოვნებით უნდა ეცვას. ბევრჯერ მინახავს წვეულებაზე იმდენად გამომწვევად ჩაცმული მანდილოსანი, რომ თავად მიგრძნია უხერხულობა. შეიძლება გეცვას მოკლე და დეკოლტირებული კაბა, მაგრამ გემოვნებიანი და სადა, რომ შენი სექსუალობით სხვა არ გააღიზიანო. სამწუხაროდ, ქალების უმეტესობა არ ცდილობს სხეულის პრობლემური ზონების დაფარვას, მუცლიან ქალებს ისეთი ვიწრო მაისურები აცვიათ, ვგიჟდები.
- თავად რა მეთოდებს მიმართავ ფორმის შესანარჩუნებლად?
- მე როგორც კი წონას მოვიმატებ, სასწრაფოდ ვიწყებ დიეტას, ვვარჯიშობ სისტემატურად. არ მიყვარს, როცა ქალს საკუთარი წონა არ აწუხებს და თავს არ უვლის. ჩემთვის ეს მიუღებელია.
- მამაკაცის გარეგნობაც მნიშვნელოვანია თქვენთვის?
- არ მქონია ისეთი შემთხვევა, რომ ბიჭი ფიზიკურად არ მომწონებოდა და ურთიერთობისას შემყვარებოდა. მე ჯერ უნდა მომეწონოს მამაკაცი და მერე ვიწყებ მასთან ურთიერთობას. მომწონს საქმიანი, წარმატებული და მოწესრიგებული ბიჭები. კონკრეტული კრიტერიუმები არ მაქვს, ახლა თავისუფალი ვარ და შეყვარებულიც არ მყავს.
- ვის რჩევებს ითვალისწინებ სამოსის არჩევისას?
- შინიდან გასვლისას მე და ჩემი და ვეკითხებით ერთმანეთს რჩევას. მეგობრების აზრსაც ვითვალისწინებ. ვიცი, მათ ჩემთვის კარგი უნდათ.
- პრეტენზიული მყიდველი ხარ?
- ადრე ერთ კონკრეტულ დღეს ვირჩევდი საყიდლებისთვის. დილიდან საღამომდე შემეძლო მაღაზიებში სიარული და სამოსის შერჩევა. ახლა ამას ვეღარ ვახერხებ, შევირბენ მაღაზიაში, თუ რამე მომეწონება, მოვირგებ და ვყიდულობ. არ მიყვარს სამოსის შეკერვა, რამდენჯერაც ვცადე, არასდროს გამოვიდა ის, რაც მინდოდა. არც ინტერნეტშოპინგის მოყვარული ვარ, ვერ დაველოდები, როდის ჩამოვა სამოსი და იქნება თუ არა ის ზომა ან ფერი, რაც შევუკვეთე. ბრენდებიდან გამოვარჩევ "ზარას".
- მაკიაჟს ყოველდღიურად იკეთებ?
- ჩემს ჩანთაში რომ ჩაიხედოთ, ტუჩის ფანქრის გარდა ვერაფერს იპოვით. მინდა, სულ გამოპრანჭული ვიყო და მაკიაჟით ვიარო, მაგრამ ვერ ვახერხებ, მავიწყდება. მხოლოდ ტელევიზიაში ყოფნისას მიწევს საეთერო გრიმის გაკეთება.
- ეკა, როგორც ვიცი, ადრე თავად ქმნიდი აქსესუარებს, ისევ განაგრძობ ამ საქმეს?
- ძალიან მიყვარს აქსესუარები. ადრე მართლაც ვაკეთებდი სამაჯურებს, საყურეებს, ვრთავდი ქუდებს, ლარნაკებს და ჩარჩოებს. განსაკუთრებით მომწონს ტყავის ყელსაბამები და უამრავი მაქვს. უსაათოდ შინიდან არ გავდივარ. ერთ-ერთ მაღაზიაშიც მქონდა ჩაბარებული ჩემი ნაკეთობები, მაგრამ ეს საქმე ბიზნესად ვერ ვაქციე. გამოფენაც შემომთავაზეს, მაგრამ უარი ვთქვი. სამოსი რომ მიძველდებოდა ან მიფუჭდებოდა, ვაახლებდი. ახლა ამას ვეღარ ვახერხებ.
- ვიცი, რომ "კომედი შოუსთან" ერთად თეატრშიც ხარ დაკავებული.
- "ილიაუნის" თეატრში ვთამაშობ სპექტაკლ "ფსიქოზში", თეატრალურ უნივერსიტეტში კი ვემზადებით პრემიერისთვის "ეზოში ავი ძაღლია". ადრე "თავისუფალ თეატრშიც" ვთამაშობდი.
- რეჟისორები სატელევიზიო იუმორისტული გადაცემის მსახიობებს არ სთავაზობენ როლებს და ხშირად აკრიტიკებენ კიდეც. თავად თუ შეჯახებიხარ პრობლემას ამის გამო?
- ზოგიერთი რეჟისორი ნამდვილად ასეა განწყობილი იუმორისტული გადაცემების მსახიობების მიმართ. ბევრჯერ მითხრეს ამის გამო როლზე უარი, მაგრამ, მადლობა უფალს, ვთანამშრომლობ "კომედი შოუსთან", მაქვს საკუთარი საქმე. არასდროს მინანია "კომედი შოუში" მუშაობა და ვიცი, არც ვინანებ.
- სკეტჩებისთვის სხვადასხვაგვარი ტიპაჟის განსახიერება არ გიჭირს?
- როგორ ვახერხებ, არ ვიცი. ყოფილა შემთხვევა, როლი ვერ მომირგია, მაგრამ ბიჭები მეხმარებიან.
- რას ურჩევ ქართველ ქალებს?
- ვურჩევ, თავს მოუარონ და წონა აკონტროლონ.
თამარ ბოჭორიშვილი
ყოველკვირეული გაზეთი "ყველა სიახლე"
